ماں کی گود سے قبر تک علم حاصل کرو ‘‘ کیا یہ حدیث ہے ؟

بِسْمِ اللہِ الرَّحْمٰنِ الرَّحِیْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

سوال میں ذکر کردہ الفاظ معتمد کتبِ حدیث میں تلاش کے باوجود نہیں مل سکے۔ لہذا اس قول کو حدیث نہیں کہا جا سکتا، البتہ اس مضمون پر مشتمل مختلف اقوال بزرگوں سے منقول ہیں۔ جب تک کنفرم نہ ہو جائے، کسی بھی بات کو بطورِ حدیثِ پاک آگے شیئر نہیں کرنا چاہیے، کیونکہ غیر ثابت شدہ بات حضور اکرم صلی اللہ تعالی علیہ وآلہ وسلم کی طرف قصداً منسوب کرنا حرام ہے، حدیث ِ مبارک میں اس پر سخت وعید ارشاد فرمائی گئی ہے۔

تفسیر نیشاپوری میں ہے:” قيل فی تحديد مدة طلب العلم، إنه من المهد إلى اللحد“یعنی:طلبِ علم کی مدت کی حد کے بارےمیں کہا گیا کہ مہد سے لے کر لحد تک ہے۔(تفسير النيسابوری، جلد4،صفحہ 237، دار الكتب العلميه بيروت)

تعلیم المتعلم میں ہے:”قال محمد بن الحسن ان صناعتنا ھذہ من المھد الی اللحد“یعنی:امام محمد بن حسن رحمۃ اللہ تعالیٰ علیہ فرماتے ہیں کہ ہمارا یہ کام ( علم سیکھنا ) تو مہد سے لے کر لحدتک ہے۔ (تعلیم المتعلم، فصل فی التوکل ، صفحہ115، المکتب الاسلامی)

مناقبِ امام احمد بن حنبل میں ہےکہ امام احمد بن حنبل علیہ الرحمۃ فرمایا کرتے تھے:”أَنا أَطلب العلم إلى أَن أَدخل القبر“یعنی: میں علم کو طلب کرتا رہوں گا،یہاں تک کہ قبر میں داخل ہوجاؤں گا۔(مناقب الإمام أحمد ،صفحہ 37،مطبوعہ دار هجر)

مفتی احمد یار خان نعیمی علیہ الرحمۃ فرماتے ہیں:”صوفیاء فرماتے ہیں: اطلبوا العلم من المهد إلى اللحد“یعنی گہوارہ سے قبر تک علم سیکھو ۔ (مراٰۃ المناجیح ، جلد1، صفحہ 203، مطبوعہ لاھور)

مَن گھڑت بات حضور اکرم صلی اللہ تعالی علیہ والہ وسلم کی طرف قصداً منسوب کرنے کی حدیث ِ مبارک میں سخت وعید ارشاد فرمائی گئی ہے۔ چنانچہ صحیح بخاری میں حضرت سیدنا ابو ہریرہ رضی اللہ تعالی عنہ سے مروی ہے: نبی اکرم صلی اللہ تعالی علیہ والہ وسلم نے ارشاد فرمایا:’’من کذب علی متعمدا فلیتبوأ مقعدہ من النار‘‘ترجمہ : جس نے مجھ پر جان بوجھ کر جھوٹ باندھا،وہ اپنا ٹھکانہ جہنم میں بنا لے۔(صحیح البخاری، جلد 1، صفحہ 33، مطبوعہ مصر)

وَاللہُ اَعْلَمُ عَزَّوَجَلَّ وَرَسُوْلُہ اَعْلَم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم