میں شفاعت کروں گا

 حدیث شریف میں صدیق اکبر رَضِیَ اللّٰہُ تَعَالٰی عَنْہُ سے روایت ہے کہ حضور ﷺ نے فرمایا جو بھی مجھ پر درود شریف پڑھے گا میں قیامت کے دن اس کی شفاعت کروں گا“ (افضل الصلوۃ صفحہ ۴۰)

تمام دکھوں کی کفایت 

 حدیث شریف میں ہے حضرت ابی کعب  اللہ رَضِیَ اللّٰہُ تَعَالٰی عَنْہُ نے حضور  سے عرض کی حضور! میں آپ ﷺ پر کثرت سے درود بھیجنا چاہتا ہوں اس کی تعداد کیا مقرر کروں۔ فرمایا جتنا تیرا جی چاہے عرض کی وقت کا چوتھائی حصہ، فرمایا تجھے اختیار ہے بڑھا دے تو تیرے لیے بہتر ۔ عرض کی نصف۔ فرمایا تجھے اختیار ہے بڑھا دے تو تیرے لیے بہتر ، عرض کی حضور سارے وقت کو آپ ﷺپر درود شریف کے لیے مقرر کرلوں، فرمایا اس صورت میں تیرے سارے فکروں کی کفائت کی جائے گی اور  تیرے گناہ بھی معاف کر دیئے جائیں گے (مشکوۃ شریف صفحه ۸۶)

چہرہ روشن ہو گیا

حضرت ابن حامد قزوینی علیہ الرحمہ نے اپنی کتاب ” مفید العلوم میں ذکر کیا۔ ایک شخص اور اس کا بیٹا اکٹھے سفر کر رہے تھے کہ سفر میں باپ کا انتقال ہو گیا اور فوراً اس کی شکل بگڑ گئی ، بیٹا اس حالت پر رویا اور دعائیں کیں۔ سو گیا خواب میں دیکھا کوئی شخص کہہ رہا ہے تیرا باپ سُود کھایا کرتا تھا اس لیے اس کی شکل بگڑ گئی مگر حضور ﷺ  نے اللہ کی بارگاہ میں اس کی سفارش کر دی ہے کہ یا اللہ یہ بندہ میرا نام سن کر درود شریف پڑھا کرتا تھا اس کا چہرہ روشن فرما دے۔ آنکھ کھلی تو اس کے باپ کا چہرہ روشن تھا شکل درست تھی۔(فضائل صفحه (۳۱)

جنت کا مشاہدہ

 حدیث شریف میں ہے حضور  ﷺ نے فرمایا جو شخص مجھ پر ہر روز ایک ہزار مرتبہ درود شریف پڑھے تو موت سے پہلے اپنا مقام جنت میں دیکھ لے گا (افضل الصلوة صفحه (۲۱)

دوزخ سے نجات

 حدیث شریف میں ہے حضور ﷺ نے فرمایا ” جو شخص مجھ پر ہر روز سو مرتبہ درود شریف پڑھے تو اللہ تعالی اس کی سو حاجتیں پوری فرمائے گا سب سےآسان حاجت دوزخ سے نجات ہے(افضل الصلوة صفحه (۲۱)