حدیث اوّل الرسل

الجواب : حضرت بابرکت دامت برکاتہم السلام علیکم و رحمۃ اللہ وبرکاتہ ، یہ حدیث سیدنا ابوذر علیہ الرضوان سے مسنِد احمد میں یوں ہے۔ قلت یارسول اللہ ای الانبیاء کان اوّل قال اٰدم ، قلت یارسول اللہ و نبی کان ، قال نعم نبی مکلم”۱ ؎ میں نے عرض کیا یارسول اللہ ! کون سا نبی سب سے اوّل ہوا؟ آپ نے فرمایا آدم میں نے کہا وہ نبی تھے؟ آپ نے فرمایا وہ نبی تھے جن سے کلام کیا گیا ہے۔(ت)

( ۱ ؎ مسند احمد بن حنبل عن ابی ذر رضی اللہ عنہ المکتب الاسلامی بیروت ۵/ ۱۷۸ )

اور نوادر الاصول تصنیف امام حکیم الامۃ ترمذی کبیر میں ان سے مرفوعاً یوں ہے: اول الرسلٰ اٰدم واخرھم محمد علیہ وعلیھم افضل الصلّوۃ والسلام۔ ۲ ؎ رسولوں میں اوّل آدم اور ان میں آخر محمد ہیں، آپ پر اور سب رسولوں پر بہترین درود و سلام ہو۔(ت)

( ۲ ؎ الجامع الصغیر بحوالہ الحکیم عن ابی ذر رضی اللہ عنہ حدیث ۲۸۴۶ دارالکتب العلمیۃ بیروت ۱/ ۱۶۹)

والا نامہ کل یکشنبہ کو بعد روانگی ڈاک ملاورنہ کل ہی جواب حاضر کرتا والتسلیم۔